Ribaro MK

ништо не е наивно, само така изгледа

Ова е прв прилог/интервју со мене од некој прилепски медиум. Она – урбан херој, е уметнички впечаток на уредникот, да си немаме забуни и да не ствараме обврски (смајли). Фала 10без10!

16636_202360177916_3586811_n

Јане Рибаро, во Прилеп колку го знаат – толку не го знаат, што не е случај ако гледаме подалеку од Прилеп. Човекот од кај кого ќе купите чевли, а нема да знаете дека со своите сатирични видео клипови е неизлечива главоболка на секој политичар. За оваа наша рубрика посветена на обичните луѓе, истовремено урбани херои, Јане а.к.а Рибаро, одвои малку време, малку живци… и кафе ќе си даеше ама бизнисот не трпи толку жртви 🙂 . Еве го човекот кој е заштитен знак на Прилеп во македонскиот виртуелен простор!

Преку ден самовработен кој се преобразува во највлијателниот блогер во Македонија. Кое е твоето алтер его?

Не знам кај вас како е, но ние во Прилеп немаме алтер ега, ами прекари. Ко прав прилепчанец сакав да ме викаат Јане Задрогаз, ама во Прилеп не те викаат на прекар како што ти сакаш, ами прекар ти останува оној на кој најмногу се лутиш. Јас не се лутев на ни еден прекар што се обидуваа да ми го налепат и си останав безпрекарешко, па морав да си измислувам сам. Си измислив псевдоним за на блог – кој некој го препознава, некому му доаѓа да му скрши глава, а некому да го гушне. Најбитно ми е тоа што ретко кој што се сретнал со мој блог пост или мое видео, останал рамнодушен. Се’ дури имам повеќе блог/влог гушкачи, моето блог име ќе е – Рибаро. Ако речам дека добро е што во Прилеп ретко кој ме препознава под псевдонимот, како ќе бидам сфатен?

Како врви живеачката на Јане Ѓ. алијас Рибаро?

Како агностик по убедување можам да кажам – фала богу (смајли), добро е. Инаку, среќен сум секое утро кога ќе се разбудам и тоа ми е доволно се’ дури не стасам до купатило. После првиот туш сум хронично не задоволен од се’ и, борбата за и со предвизвиците може да почне.

Да се издржи или да се бега прашање е сега?

Има еден мозаик на плоштад (мислам дека се’ уште го има) на кој пишува: Тоа е вечна борба. Мене од сите скулптури и споменици во Прилеп, токму тој ми е највпечатлив и некако најмногу со него се идентификувам, а и градот. Во мојот речник немам зборови: бега, крие… Значи можат само со сила да ме избркаат, јас нема да избегам, зашто не се предавам. Мојата парола е:Нема да им помине! Но, секогаш има една граница до каде допира разумното, а каде почнува лудото и тоа секако колку и да се труди човек да го пренамогнува, го сеќава. Пред скоро време – кога беа студентските протести, го направив анимираниот клип со наслов: Заминуваме – Проект на Владата на Република Македонија! Клипот е опомена, како впрочем и сите мои 40 и кусур видео клипови, кои до сега ги имам направено, а се социјално и политички ангажирани.

Kаде е твоето култно место? Пред тастатура не се рачуна.

Улицата е моето култно место, секое прилепско сокаче со својата приказна е моето култно место. Ако веќе треба да се лоцирам, тогаш тоа е кај Ѕидот. Сакам да си го замислувам Ѕидот и камената бина како форум – место каде секој што има нешто да каже и покаже, а тоа да е јавно храбро и не онлајн, да го направи од камената бина кај Ѕидот. Кога некогаш би го претставувал мојот опус на видео клипови, тогаш би одбрал тоа да го направам токму на бината кај Ѕидот. Видиш тоа е добра идеја 🙂 . Друго место со кое сакам да се идентификувам како прилепчанец е прилепскиот театар. Во театарот ми е најубаво. Екипата – младите актери од театарот се нашата прилепска гордост – оние со кои се фалам по светот.

Прилеп некогаш и сега низ твојата диоптрија?

Градот не го гледам како објект, туку како жив и јас во него. Сите можат да си раскажат своја приказна за градот, која е нивна и секако различна од објективната. А, која е објективна всушност? Никогаш не ми оделе навраќањата. Евоцирањето ми е асоцијација на нешто старо и износено. Ви текнува на муабетите од типот, – а бе порано имаше музика, а не сега ова, или – кога одевме на корзо беше филинг тоа, а не сега по кафичи се затвораат младиве… Многу глупо ми е тоа. На Твитер имаме хаштаг за ова прашање #умоевреме. #умоевреме е уствари лузерски хаштаг, кој кога го употребувам претежно е со саркастична содржина. Затоа пак, ќе ви кажам како сакам да го видам Прилеп. Сакам да го видам без диоптрија – онака мешан, врвулица како во пазарен ден, како слободарски град сакам да го видам мојот Прилеп.

П.С. Сакам да ја искористам оваа прилика и да го потсетам мојот офталмолог дека Благоец помина, тој уште не ми се јавил да закажеме операција.

Објавено на 05 Мај 2015, во 10bez10.com

Ви се допаѓа? Споделете го со вашите пријатели

Би можело да те интересира:

Categories: Интервјуа

Коментирај со Фејсбук:


Sponsors

  • Лиценца

    Creative Commons License
    Овој блог - дело by ribaro е лиценциран со Creative Commons Наведи извор-Некомерцијално 2.5 Macedonia License.
    Засновано врз работата на блогот: ribaro.mk.
  • Пик

  • Категории

  • Архива