Ribaro MK

ништо не е наивно, само така изгледа

Гостински пост на Елена Николовска10501589_10203790640193836_2593516723628180297_n:

„Синоќа се возев со такси (да, да, повторно јас со моите “такси приказни”) и уште не сме тргнале прописно, таксистот ме прашува дали сум ја читала книгата “Тесла метаморфозис”. Не го ни интересираше одоговорот, едноставно си почна да си раскажува за книгата и за тоа како преку неа научил за посебно лекување преку далечина, па како тоа што Тесла го пишувал како дизајн Ајнштајн го правел како цел проект, па како Ајнштајн успеал да пренесува луѓе на далечина, но се случил некој куршлуз, па така неколку луѓе останале споени со брод (телата им се втиснале во бродот), па како со помош на некој изум на Ајнштајн (некаков посебен скенер, сателитски!) се знае локацијата на гробот на Александар (кај Свети Николе) и дека е почнато со копање и никој таму не пуштаат, па кога ќе го откопаат па кога ќе рикнат Грците…. Па потоа ме праша дали сум го читала букварот од некоја професорка Маргарита (мислам) во кој јасно се велело дека македонскиот јазик е најстариот јазик во Европа и дека сите европски јазици водат потекло од него, па пак се наврати на лечењето преку далечина, па стигна до Саи Баба….и веќе пристигнавме до мојата улица. Немаше време повеќе.
Прво мислев дека човеков онака намерно ме трола бидејќи ми ја виде значката закачена на палтото – 5 мајска хулиганка, но како напредуваше со приказните и со каква воодушевеност и малтене љубов го раскажуваше сето тоа, ми стана јасно дека човекот стварно верува во тоа што го зборува.
Долго вечерта потоа мислев на него и се обидував да пробуричкам во сопствените емоции дали имам за него сожалување или страв или гнев или тага…..Ми стана јасно дека немав емоции, исто како што немам емоции за оние кои одат на контра протести, бидејќи ним толку им е. До таму им е. И ќе им биде се’ додека гледаат режимски телевизии и читаат режимски портали или додека истите не бидат затворени на ист начин како што беше затворена А1. Едноставно луѓето се заслепени од пропаганда, скоро исто како “мојов” таксист што е заслепен со фикции, мистерии и заговори. Едноставно не можам дури ни да им се лутам, како што не можам да се лутам на тригодишно дете кога ненамерно крши чаша.

Продолжив со интроспекција. Си разјаснив дека она што го чувствувам за подмитените, уценетите и условените со работа (идна или сегашна) или со затвор, инспекција, пријава итн,, а знаат точно што се случува, е презир. Секогаш ќе бидат ниската каста која ќе има потреба од некој посилен од нив, за да мислат дека некако тераат низ животот со муабетот “ќути, може полошо да биде”. Убедена сум дека кога биле малечки, тие биле оние децата кои се плашеле од маалскиот силеџија и го бодреле кога тој ја напаѓал својата жртва само заради тоа што се плашеле тие да не паднат на милост и немилост на силеџијата. Пази боже да застанале некогаш во одбрана на жртвата. Е, токму такви ќе останат до крајот на своите животи. Мизерни.

За оние “најглавните”, оние конструкторите, идејните креатори, директните извршители и нивните слуги, не сакам да споделам какви се’ чуствства имам.

Просто ОЧАЈ чувствувам за оние релативно добро ситуираните, релативно образованите, вработени во државни институции, странски и приватни компании, банки, па дури и меѓународни организации од типот на УНДП, ОБСЕ и слични, не се уценети, не се заплашени, не ја должат сопствената кариера никому освен на себе и седат дома. Ги следат сите информативни гласила, имаат изграден став, јасно им е се’, ја знаат вистината и СЕДАТ ДОМА!!!!! Ним, ним, скоро исто не можам да им простам колку и оние чие име не сакам да го кажам.

Драги роднини и пријатели, излезете. Излезете за да не биде “сите се исти”. Излезете за да на сите наредни ова им биде лекција како не треба! Како нивното работење и постапки, кои и да се, ќе бидат будно следени и дека за многу помали криминали и неправилности пак ќе покажеме бунт и револт. Излезете и покажете дека ВИ Е грижа дека “они” се аболирани за страшни работи, а вие се мислите како да ја платите казната за пребрзо возење (130 км/час) на автопат или некој друг престап толку тривијален во споредба со нивните криминали, што ми се плаче веќе од мака.
Излезете, бидејќи на крај и нас ќе треба да не’ гледате во очи.“

#Протестирам

#ШаренаРеволуција

Ви се допаѓа? Споделете го со вашите пријатели

Би можело да те интересира:

Categories: Разно

Коментирај со Фејсбук:


Sponsors

  • Лиценца

    Creative Commons License
    Овој блог - дело by ribaro е лиценциран со Creative Commons Наведи извор-Некомерцијално 2.5 Macedonia License.
    Засновано врз работата на блогот: ribaro.mk.
  • Пик

  • Категории

  • Архива